काठमाडौं। बोगटी परिवारको लगानी रहेको भागेश्वर सुगर र केमिकल इन्डस्ट्रिजको व्यापार बढेको छ। कम्पनीले सन् २०२१/२२ मा १ अर्ब २९ करोड रुपैयाँको कारोबार गरेको छ। अघिल्लो वर्ष २०२०/२१ मा ९६ करोड रुपैयाँको व्यापार थियो।

०१९/२० मा १ अर्ब र २०१८/१९ मा ९६ करोड ६० लाख रुपैयाँको कारोबार कम्पनीले गरेको थियो। दैनिक २५ सय टन उखु पेल्न सक्ने क्षमता रहेको कम्पनीमा लाल बोगटी र उनका तीन छोराहरु शंकर बोगटी, टेक बोगटी र गणेश बोगटीको स्वामित्व छ।

दैनिक ३० हजार टन उखु पेल्न सक्ने क्षमता नेपालमा स्थापित चिनी उद्योगहरुसँग छ। जसमध्ये ८ प्रतिशत हिस्सा भागेश्वर सुगरको रहेको इक्रा नेपालको रेटिङ विवरणमा उल्लेख छ।

सुदूरपश्चिममा उद्योग रहेको कम्पनीले २०२१/२२ मा चिनी बिक्रीबाट ८८ प्रतिशत आम्दानी गरेको छ। अघिल्लो वर्ष यो ९० प्रतिशत थियो। सन् २०१६ बाट व्यवसायिक उत्पादन थालेको उद्योग साढे २ अर्ब लगानीमा खुलेको थियो।

कम्पनीले ५८ करोड १३ लाख रुपैयाँको दीर्घकालीन कर्जाका लागि एनपी एल ट्रिपल बी माइनस र ३५ करोड रुपैयाँको अल्पकालीन कर्जाका लागि एनपी ए थ्री रेटिङ पाएको छ। इक्रा नेपालले कम्पनीको रेटिङ बढुवा गरेको छ।