शिवम् अर्गनाइजेशनद्वारा सञ्चालित शिवम् एग्रो उद्योग प्रालिको व्यापार रिबाउन्ड हुँदै गएको छ । कोरोना महामारीले गर्दा घटेको व्यापार कोरोनापछि पुनः रिबाउन्ड हुँदै गएको कम्पनीले जनाएको छ ।

कम्पनीकाअनुसार सन् २०२१ को तुलनामा ३३.६४ प्रतिशतले व्यापार बढेको हो । कम्पनीले सन् २०२१ मा १ अर्ब ८ करोड ५० लाख रुपैयाँ र सन् २०२२ मा १ अर्ब ४५ करोड रुपैयाँको व्यापार गरेको छ । सन् २०२२ मा बजारमा प्रिमियम ब्रान्डको चामलको उच्च माग हुँदा व्यापारमा उछाल आएको कम्पनीको भनाइ छ ।

कम्पनीले सन् २०२० मा १ अर्ब २४ करोड १० लाख रुपैयाँको व्यापार गरेको थियो । सन् २०१२ मा स्थापना भएको कम्पनीले एग्रो क्षेत्रमा काम गर्दै आएको छ । कम्पनीले धान प्रशोधन गरी विभिन्न ब्रान्डमा चामल बिक्री वितरण गर्दै आएको छ ।

कम्पनीले लङ ग्रेन र जीरा मसिनो चामल ७ वटा ब्रान्डमा ५ केजीदेखि ३० केजीको प्याकेजिङमा बिक्री वितरण गर्दै आएको छ ।

कम्पनीले भारतबाट कच्चा पदार्थ आयात गरी चामल उत्पादन गर्दै आएको छ । शिवजीप्रसाद शाह कल्वार अध्यक्ष रहेको कम्पनीले अल्पकालीन तथा दीर्घकालीन कर्जाका लागि १ अर्ब ९ करोड १७ लाख रुपैयाँको रेटिङ गराएको छ ।

कम्पनीले अल्पकालीन कर्जाका लागि १ अर्ब रुपैयाँ अर्थात् एफोर र दीर्घकालीन कर्जाका लागि ९ करोड १७ लाख रुपैयाँ अर्थात् डबल बी रेटिङ पाएको छ ।

कम्पनीको देशभर दुई सयभन्दा बढी होलसेल र ४ वटा स्थानमा उद्योग छ । साथै, काठमाडौं, पोखरा र जीरीमा मार्केटिङ कार्यालय छन् । त्यस्तै, कम्पनीले चालू आर्थिक वर्षको ६ महिनाको अवधिमा ९० करोड रुपैयाँको व्यापार गरेको छ । गत वर्षको सोही अवधिमा कम्पनीले ७५ करोड रुपैयाँको व्यापार गरेको थियो ।

कम्पनीले सन् २०२२ मा ७.०२ प्रतिशतले नाफा कमाएको छ । सन् २०२१ मा कम्पनीले ७.३२ र सन् २०२० मा ८.३२ प्रतिशतले नाफा कमाएको थियो ।